إزاي كمهندس حديث تخرج ممكن يتنصب عليك

مهندس حديث تخرج

لو انت مهندس حديث تخرج، مهم جداً إنك تحتفظ بالبوست ده وتقراه بعناية شديدة جداً. لأنك هتعرف من خلاله أشهر طرق النصب على المهندسين حديثي التخرج واللي مع الأسف أصبحت منتشرة مؤخراً بشكل كبير واتعرضلها آلاف من المهندسين.

• 1- وظيفــة الأحلام

هيوصلك Job Offer على الايميل من شركة أجنبية عشان انت اتقبلت في فرع الشركة في دبي براتب ماكنتش تحلم بيه ومزايا وظيفية تفوق تصوراتك.. أخيراً الزهر هيلعب معاك يا معلم ومليونير مليونير بكرة هبقى مليونير.
وتبدأ بينك وبين الشركة سلسلة من الايميلات عشان يوضحولك الإجراءات المطلوبة للسفر، وبالفعل هتبدأ تاخد خطوات جدية تمهيداً للسفر، وبعد ماتخلص أغلب الإجراءات اللي ممكن تستغرق شهر.. حد من الشركة هيتواصل معاك لتحديد موعد السفر وهيطلب منك تحويل مبلغ مالي على رقم حساب خاص بالشركة عشان إنهاء الإجراءات من خلالهم.. وبمجرد ما تحول المبلغ.. الشركة هتختفي ومعاها وظيفة الأحلام ودي اللحظة اللي هتكتشف فيها إنك اتنصب عليك يا معلم.

• 2- الابليكيشن داي الابليكيشن داي

مالها الابليكيشن دي يا أبو عمو؟ احنا عملناها بـ 50 جنيه بس
اللي بيحصل إنك بتشوف إعلان وظيفة على جروب على فيسبوك وفي الغالب اللي منزل الإعلان Fake Account وحضرتك بتبعت الـ CV بتاعتك بتجيلك مكالمة تروح تعمل انترفيو، قبل الانترفيو بيطلبوا منك تملى استمارة طلب توظيف واللي بيكون ليها رسوم بسيطة 50 ج. تدفع.. تدخل انترفيو وهمية.. ولو في نصيب هنبقى نكلمك. ولا دي شركة ولا دي انترفيو.. ده مقر مؤقت لشركة وهمية بتتاجر بطموحات الشباب وتستغل حاجتهم للشغل، وفي شهر واحد بس ممكن يكونوا عملوا 10000 مقابلة بـ 500 ألف جنية.

• 3- ابعتلنا الأوراق دي

شركة تطلب منك إنك تسلمها مسوغات التعيين الخاصة بيك (شهاداتك وصورة بطاقتك وكارنية النقابة… إلخ) قبل مايتعمل لك إنترفيو أو قبل ماتتقبل في الشركة أصلاً، وده مش صح.. المفروض إن الأوراق الخاصة بتعيينك بالشركة بتقدمها فعلاً ولكن بعد الإنترفيو وبعد مايتم قبولك وتتفقوا على كل التفاصيل وفي مرحلة التعاقد.

• 4- اختبار عملي

شركة تكلمك تروح تعمل مقابلة.. يسلمك لوحات مبنى ويطلب منك إنك تعمل تصميم أو حصر كميات للبنود أو أي Task تانية خلال أسبوع مثلاً وتسلم شغلك، وبناءً عليه هيتم تقييمك، طبعاً إنت بتجتهد قدر استطاعتك وتسهر ليل نهار عشان تخلص الـ Task اللي طلبوها منك وفي اعتقادك إن هيتم تقييمك عليها، ولكن للأسف دي مجرد اشتغاله وانت في كل الأحوال مش هتقبل وانت كده عملتلهم شغل ببلاش وهيشوفوا غيرك كل مايتزنقوا في شغلانه.

• 5- انت تنزل معانا تدريب

بعد ما اتقبلت في الشغل بلغوك إنك هتشتغل معاهم فترة اختبار 3 شهور بدون مقابل، عشان يقدروا يقيموا مستواك و يقنعوك إنك في الفترة دي إنت بتتعلم و الشركة مش بتستفيد منك، وبعد الـ 3 شهور كل اللي بتتمناه هيتحقق، طبعاً دي من ضمن طرق النصب و بعد الـ 3 شهور هيمشوك ويجيبوا غيرك يعملوا معاه نفس الحركة وهكذا.

• 6- ده مجرد إجراء روتيني

هو حضرتك قبلت معانا ودي نسخة من عقد العمل بتع حضرتك والـ Job Offer ، وتقدر تستلم شغلك من بكره، حضرتك بس ممكن توقع لي على الورق ده. وتلاقي بين ايديك عقد مكتوب فيه شرط جزائي بمبلغ 100 ألف جنية إنك ماينفعش تسيب الشغل قبل 3 سنين، واستمارة 6 لفصلك من التأمينات في أي وقت، واستقالة مسبقة بدون تاريخ عشان وقت مايحبوا يمشوك ماتطالبش بحقوقك.
الكلام ده غير قانوني ومش المفروض إنك تقبل بيه تحت أي ظرف.

• 7- انت ابن الشركة

تتفق على Job Description مقابل Salary معين، وبعدها بشهرين معلش يا بشمهندس اعملنا التصميم ده معاك على السريع.. انت ابن الشركة برضه
طب معلش يا بشمهندس خد الحصر ده خلصه في البيت مع المستخلص عشان مهندس الحصر أجازة.. مش انت ابن الشركة برضه
بالمرة بقى خد مفتاح المخزن عشان رفدنا أمين المخزن وقفل سراكي العمل وحاسبهم ونيمهم في سرايرهم وهات الولاد معاك من المدرسة والخضار للمدام وانت مروح يابن الشركة
ووقت ماتحس إن ضغط الشغل كبير عليك وتفكر تطلب زيادة راتب هتبقى شخص شرير عشان ابن الشركة المفروض يبقى قلبه على الشركة ويتفانى في عمله ومايفكرش يتجاوز حدوده ويطالب بحقه لا سمح الله.

• 8- عندك انترفيو.. هات معاك اللاب توب

بعد ماكنت قرب تيأس من الايميلات اللي بتبعتها للشركات وماحدش بيتصل بيك، أخيراً وبعد طول انتظار موبايلك بيرن.. رقم غريب.. بنت صوتها حلو.. صباح الخير يا بشمهندس.. حضرتك كنت مقدم الـ CV بتاعتك عندنا في الشركة واتحددلك ميعاد انترفيو بكرة الساعة 10 الصبح هتقابل الكفيل، ولو في نصيب إن حضرتك تكون معانا اعمل حسابك إن السفر هيكون خلال أسبوعين.. آه ابقى هات معاك اللاب توب بتاعك يكون عليه برنامج أوتوكاد عشان هيكون فيه اختبار تكنيكال.. هننتظرك تنورنا بكرة بإذن الله سـ ســــ سلام

تروح تاني يوم معاك اللاب توب بتاعك ومبلغ معين عشان هتخلص شوية إجراءات خاصة بالتعيين أو السفر زي الكشف الطبي وخلافه، قبل الانترفيو يقابلك مندوب من الشركة ياخدك تعمل الكشف الطبي في أحد المراكز الطبية وتضطر تسيب معاه شنطة اللاب توب بتاعتك.. تخرج ماتلاقيهوش طبعاً والرقم الذي طلبته غير متاح حالياً.

• 9- ما تيجي.. اأمن عليك

مهندس حديث تخرج مش لاقي شغل.. مقاول يطلب منك صورة بطاقتك وصورة كارنية النقابة بدون ماتكون شغال معاه عشان يأمن عليك ويقدر يشيل شغل باسمك أو يسجل نفسه في اتحاد مقاولي التشييد والبناء أو يرفع فئة التسجيل، وفي المقابل هيدفعلك مبلغ مالي وهيقنعك إن ده إجراء روتيني مؤقت مش هيضرك في شيء أو إنه هيفصلك من التأمينات بعدها لو عاوز.

• 10- طير انت

هسفرك.. يلا عشان تسافر.. احجز تذكرتك.. حضر شنطتك..
وعود وآمال وهمية بيرسمهالك سماسرة السفريات ويقنعك إنك تدفع مبلغ مالي عشان يسفرك، في أغلب الحالات هتدفع مبلغ كبير يتراوح من 50 ألف إلى 150 ألف على فرصة سفر ممكن تكون وهمية، و كتير من اللي سافروا بالطريقة دي اكتشفوا بعد السفر إنهم اتنصب عليهم أو سافروا على وظيفة غير مناسبة.

الخلاصة مهندس حديث تخرج

• ماتدفعش أي فلوس عشان تملى ابليكيشن بأي شركة
• ماتروحش أي مقابلات باللاب توب بتاعك
• ماتدفعش أي مبالغ مالية لأي شخص أو جهة عشان تشتغل أو تسافر
• ماتعملش أي شغل لأي شركة إلا بعد تعيينك رسمياً
• ماتوافقش تشتغل بدون مقابل
• ماتوقعش على أي شرط جزائي
• ماتوقعش على استمارة 6
• ماتوقعش على استقالة مسبقة
• ماتوافقش إن مقاول يأمن عليك إلا لو بالفعل هتشتغل معاه
• انت ابن الشركة = يا بت انتي مراتي