تعمل ايه فى إجازة الصيف يا بشمهندس

 إزاي تستغل إجازة الصيف صح..؟!

لازم تكون عارف إن إجازة الصيف هي فرصة ماينفعش تضيعها.. حاول تستغلها أفضل إستغلال ممكن

لو إنت خلصت أولى مدني و رايح تانية يبقى أفضل حاجة تتعلمها في الإجازة هي برنامج الـ AutoCAD و ماننصحكش تتعلم حاجة تاني دلوقتي.. قضي الإجازة براحتك و العب Play Station و سافر و شهيص نفسك قبل النفخ

لو إنت خلصت تانية مدني و رايح تالتة.. ده أنسب وقت تتعلم فيه برامج الـ SAP و الـ EXCEL و لو لسه ما اتعلمتش الأوتوكاد يبقى تلحق تتعلمه، و من دلوقتي تقدر تنزل تدريب موقع

أما بقى لو انت خلصت سنة تالتة مدني و رايح بكالوريوس لازم تكون عارف إن دي أهم و آخر إجازة بالنسبالك، فأي حاجة نقصاك يفضل تلحق تتعلمها قبل ما الوقت يفوت وتلاقي نفسك اتخرجت

الإجازة بين تالتة و رابعة تقدر فيها تتعلم التصميم الإنشائي بكل برامجه (AutoCAD – SAP – ETABS – SAFE – CSI Column ) بالإضافة لإن دي أنسب إجازة تتعلم فيها التنفيذ و المكتب الفني و يفضل لو قدرت تنزل تدريب موقع

لو انت رايح بكالوريوس يبقى أكيد بتفكر في مشروع التخرج.. حاول تبقى محدد بالظبط إنت هتختار مشروع إيه عشان حسب اختيارك للمشروع هتحتاج تتعلم بعض البرامج

• لازم تحدد هدفك الأول عشان تحدد طريقك.. يعني ماينفعش تبقى تايه و مش عارف إنت عاوز إيه و هتشتغل إيه، عود نفسك دايماً تفكر من الآخر للأول بمعنى إنك تقرر إنت ناوي تشتغل إيه بعد التخرج عشان تحدد إنت هتطور نفسك إزاي و هتمشي في أي طريق لأن تخصصات و مجالات الهندسة المدني كتير جداً و متشعبه و ماينفعش تبقى مش عارف إنت عاوز إيه.

• لازم الأول تعرف إيه الفرق بين المجال و التخصص.. المجال زي (الخرسانات، التشطيبات، الطرق، الـSteel ، المساحة، الهندسة الصحية...... إلخ) و التخصص زي (التصميم، التنفيذ، المكتب الفني، إدارة المشروعات)

• إنت بقى لما تتخرج غالباً هتشتغل في مجال واحد.. بس ممكن تشتغل في أكتر من تخصص.. يعني ممكن تشتغل مهندس تصميم و تنفيذ أو تنفيذ و مكتب فني أو مكتب فني و إدارة مشروعات.

• مهم بقى يا هندسة إنك تفكر و تحددد من دلوقتي إنت ناوي على إيه لأن بناءاً على القرار ده هتحدد إنت هتطور نفسك إزاي و هتتعلم برامج إيه و هتختار مشروع التخرج إيه.

• مش صح أبداً إنك كل ماتشوف إعلان كورس تروح تحضره عشان تطور نفسك.. ممكن يكون الكورس ده مش مناسب ليك أو الكورس مناسب بس التوقيت مش مناسب.. يفضل تحط Plan للكورسات اللي إنت محتاجها و التوقيت الأنسب لكل كورس.

• بلاش يبقى هدفك من الكورس هو الحصول على شهادة فقط.. لأن بإختصار شديد الشهادة اللي بتاخدها من الكورس مش هي اللي هتشغلك، المهم إنك تتعلم الحاجة و تبقى Qualified حتى لو مش معاك شهادة عشان كدة لازك تركز على إنك تفهم و تتعلم.

• لو إنت حابب تشتغل في التصميم يبقى يفضل تختار مشروع تخرج (خرسانة أو أساسات أو استراكشر) و هتحتاج تتعلم برامج ( AutoCad, Sap, Etabs, Safe, Csi col. ) و لازم تكون شاطر جداً في مواد الإستراكشر و الخرسانة، و تذاكر كود الأحمال و كود التصميم و دليل التفاصيل الإنشائية عشان دول هيبقوا أهم حاجة في شغلك.

• لو إنت حابب تشتغل في الطرق يبقى تركز في الكلية على مواد (الطرق و النقل و المرور و المساحة) و طبعاً تختار مشروع تخرجك (طرق أو مساحة) و هتحتاج تتعلم برامج (AutoCAD, Civil 3d ) و تذاكر كود الطرق.

• لو إنت حابب تشتغل في الـ Steel يبقى تختار مشروع تخرجك Steel طبعاً و هتحتاج تتعلم برامج ( AutoCad, Tekla ).

• لو إنت حابب تشتغل في التنفيذ مش هيفرق معاك كتير مشروع التخرج.. بس مهم إنك تركز على تدريب الموقع و تتابع كورسات و فيديوهات التنفيذ، و تحتفظ معاك بكتب المواصفات القياسية المصرية عشان تبقى مرجع ليك في التنفيذ ولازم طبعاً تتعلم أوتوكاد و إكسيل.

• لو إنت حابب تشتغل في المكتب الفني و إدارة المشروعات يفضل تختار مشروع تخرجك Management و هتحتاج تتعلم برامج (AutoCad, Excel, Primavera) بشكل أساسي و فيه برامج تانية ممكن تساعدك زي ( Revit, ASD ) و تركز على كورسات المكتب الفني و الإدارة.. و بعد التخرج ممكن تعمل دبلومة PRMG في الجامعة الأمريكية، و بعد 3 سنين من تخرجك تمتحن PMP عشان يبقى معاك شهادة دولية معترف بيها في إدارة المشروعات، و بالنسبة لشغل المكتب الفني و إدارة المشروعات يفضل تطور نفسك في الـ English عشان هتحتاجه كتير في شغلك.