يعني إيه أصلاً مهندس مكتب فني ؟ و إيه مسئولياته؟ و إزاي تبقى مهندس مكتب فني..؟
المكتب الفني لأي مشروع بيكون عبارة عن من مجموعة من المهندسين يرأسهم مدير المكتب الفني و يتبع إدارة المشروع مباشرةً، و مهندسين المكتب الفني بيكونوا مسئولين عن العديد من الوظائف الهامة و اللي بنعتبرها عصب المشروع و مانقدرش نستغنى عنها زي:
- • إعداد #مقايسة المشروع
- • عمل #حصر_الكميات الهندسي للبنود من اللوحات
- • تحليل أسعار البنود و #تسعير المقايسة
- • إعداد و تجهيز كافة المستندات اللازمة لدخول #المناقصات
- • إعداد #البرنامج_الزمني للمشروع و عمل منحنى #التدفق_المالي
- • إستلام الرسومات الهندسية المعتمدة من إستشاري المشروع و توزيعها على الإدارات المختلفة ( إدارة التنفيذ- إدارة المشتريات- إدارة التخطيط و المتابعة- إدارة المشروع )
- • مطابقة اللوحات المعمارية مع اللوحات الإنشائية و مع لوحات الإلكتروميكانيكال و دي بنسميها #Coordinating
- • إجراء التعديلات اللازمة على الرسومات و ردها للإستشاري للمراجعة و الإعتماد
- • عمل الرسومات التشغيلية Work shop drawings #شوب_درووينج
- • إعداد الرسومات طبقاً لما تم تنفيذه على الطبيعة As built drawings
- • عمل تعديل الأسعار و تقديم #المطالبات_المالية للمشروع
- • إعداد #مستخلصات المالك و مستخلصات مقاولي الباطن
- • تمثيل الشركة في الإجتماعات الدورية
- • إعداد جميع #ورقيات و #تقارير المشروع
- • إجراء المخاطبات و المراسلات مع كل أطراف المشروع
- • حفظ جميع ملفات المشروع من مستندات و مخاطبات و محاضر إجتماع و تقارير و لوحات و مستخلصات بالمكتب الفني
- • توثيق تسليم و إستلام المستندات و المخاطبات و اللوحات بين جميع العاملين بالمشروع
طب إيه مزايا انك تشتغل مهندس مكتب فني..؟
- 1- تنوع الخبرات.. لأن مهندس المكتب الفني هو حلقة الربط بين التصميم و التنفيذ و إدارة المشروعات... يعني هاتلاقي نفسك بقيت فاهم في كل التخصصات تقريباً
- 2- شغله يختلف عن شغل التصميم للناس اللي مابتحبش التصميم، و مش متعب و مرهق زي شغل الموقع لأنه بيكون في المكتب في التكييف 🙂
- 3- البريستيج.. و ده لأن مهندس المكتب الفني دايماً بيكون على احتكاك مباشر بإدارة المشروع و ده بيخليه طول الوقت يحضر اجتماعات مع المديرين و دي حاجة بتخليه مهندس ليه وزنه في الشركة و يترقى بسرعة
- 4- الإستقرار.. لأن مهندس المكتب الفني بيكون ماسك في إيده خيوط كل حاجة مهمة في الشركة تقريباً فمش بسهولة إن الشركة تقدر تستغنى عنه بسهولة في أي وقت و تديله الصابونة زي مابيحصل في الأقسام التانية
- 5- سرعة الترقيات.. لأن شغل المكتب الفني بيأهلك لشغل إدارة المشروعات و دي الحاجة اللي أي مهندس يتمنى يشتغل فيها
- 6- احتراف البرامج.. علشان شغل المكتب الفني طول الوقت بتستخدم فيه برامج كتير زي الكاد و الإكسيل و البريمافيرا و أحيانا الريفيت.. فده بيخليك ماتنساش البرامج اللي اتعلمتها و بتقدر تطور مهاراتك فيها و تحترفها بسرعة
- 7- الرواتب.. و دي طبعاً حاجة تهم أي مهندس.. رواتب المكتب الفني غالباً بتكون رواتب محترمة مع الوقت
- 8- فرص العمل اللي بتكون متاحة في المكتب الفني بتكون كتير نسبياً و خاصة لحديثي التخرج
- 9- شغل المكتب الفني مناسب لمهندسين مدني أو مهندسين عمارة على السواء و مش محتاج خبرة كبيرة عشان تبدأ
- 10- أنسب وظيفه في المجال بتاعنا للمهندسات تحديداً
إزاي بقى تبقى مهندس مكتب فني..؟
عشان تبدأ تشتغل مهندس مكتب فني لازم تتعلم شغل المكتب الفني زي الحصر الهندسي و المستخلصات و الشوب درووينج و التسعير... إلخ، و لازم كمان يبقى عندك فكرة كافية عن إدارة المشروعات زي العقود و المناقصات و البرامج الزمنية... إلخالبرامج الأساسية اللي لازم تكون عارفها كويس هي الأوتوكاد و الإكسيل.. و لو عاوز تبقى محترف يبقى يفضل تتعلم كمان البريمافيرا و لو هاتسافر بره مصر يبقى معاهم الريفيت
يفضل يكون عندك فكرة كافيه عن شغل التنفيذ عشان تقدر تكون متميز في المكتب الفني
لو انت لسه طالب و ما اخترتش مشروع التخرج بتاعك يبقى يفضل لو اخترت مشروع " إدارة مشروعات " ده هايساعدك في شغل المكتب الفني
روح مركز بحوث الإسكان اللي في الدقي و اشتري من هناك "كود إدارة المشروعات" و ذاكره كويس
التسميات :
معلومات الهندسة