ظاهرة التخاطر
هل في يوم كدة وانت قاعد جه على بالك شخص ما بقالك كتير متواصلتش معاه وفجأة لقيته بيرن عليك او في وشك في الشارع؟
طب جربت في مرة تبقى حاصلة معاك حاجة وحشة جداً وتلاقي والدتك بتتصل بيك بتقولك بطمن عليك أصلي قلبي مقبوض وحاسة انك مش كويس؟
طب حسيت فجأة إنك مخنوق اوي ومش عارف السبب وفي نهاية اليوم تحصل معاك حاجة وحشة او العكس تكون سعيد بلا سبب وبعدها تحصل معاك حاجة حلوة.
طب حلمت بحد اول مرة تشوفه وبعد كدة تقابله في الحقيقة ؟
كل الحالات دي وغيرها اتكررت مرة او اكتر مع أغلبنا وبنصاب وقتها بالدهشة والحيرة ومش بنلاقي تفسير منطقي للأمر.. كل ده قدر متخصصي علم اسم الباراسيكولوجي يصنفوه تحت بند حاجة اسمها "التخاطر".. أكيد سمعنا المصطلح ده اللي بقى بيتم استخدامه بكثرة مؤخراً في العلاقات العاطفية وان البنات بتستخدمه للايقاع بحبيبها وبتجبره يتقدم لها من غير ما يعرف ليه وازاي.
فايه حقيقة التخاطر وتصنيفاته ومدى صعوبته وهل حصلت فعلاً مع سيدنا عمر حالة تخاطر قوية وهل البنات اللي بتتكلم عن التخاطر على انه أسهل من حط المانيكير عندهم حق ولا بيبالغوا؟
ده اللي هنستعرضه سوا في المقال ده مع بعض.
الإنسان منذ الخليقة وهو بيراوده حلم الحصول على "قوة خارقة" تخليه سوبر هيرو ومن ضمن القوى الخارقة دي اللي حلم بالحصول عليها قراءة العقول وانتقال مباشر للأفكار من عقله لعقل غيره بدون استخدام قنوات الاتصال المادية او بمعنى أدق التخاطر.
و أصل مصطلح التخاطر (Telepathy) بيرجع للباحث النفسي مايرز اللي صاغه في سنة 1882م؛ كنتيجة لدراسة أجراها بالتعاون مع إدموند جرني، وهنري سيدجويك، وويليام باريت حوالين إمكانية انتقال الأفكار من شخص للتاني، واللي أجروها لمعرفة السبب وراء التزامن في التفكير بين شخصين مختلفين.
وممكن نعرف ظاهرة التخاطر دي بأنها القدرة على نقل الكلمات، أو العواطف، أو التخيّلات لعقل شخص تاني، بين شخصين يُطلق على أحده اسم المرسِل، وعلى التاني اسم المستقبِل بدون استخدام الوسائل الحسية للتواصل.
التخاطر بيعتبر نوع من الإدراك فوق الحسي (Extrasensory perception-ESP)، واللي بيشمل إضافة للتخاطر؛ القدرة على التنبؤ بالأحداث المستقبلية، والاستبصار، ولأن الظواهر دي لا يمكن إدراكها أو قياسها فبتعتبر من الأمور اللي مش بيؤمن بوجودها ناس كتير.
إزاي بيحصل التخاطر ؟
حسب المتخصصين في التخاطر فالدماغ عبارة عن [ ريسيفر ] بيستقبل مجموعة من الإشارات الخفية [ الخواطر ] ، بيكون ليها مجموعة من الترددات و عشان يستقبلها الشخص التاني لازم تكونوا انتوا الإتنين على نفس التردد عشان يحصل بينكم توارد في الأفكار أو بمعنى أدق تخاطر.
يعني المرسل هنا دماغه عبارة عن قمر صناعي بيرسل إشارات بترددات معينة والمستقبل عبارة عن طبق دش بياخد الإشارات دي لو متوافقة مع الترددات المتاح ليها استقبالها ويحولها عن طريق الريسفير الخاص بيه في دماغه للمعاني والأفكار اللي بعتها المرسل.
التخاطر تلات أنواع هما:-
التخاطر الغريزي (instinctual telepathy):
وزي ما هو واضح من اسمه فهو بيعتمد على الرابطة العاطفية القوية بين الشخصين، وبيحصل تلقائي بدون تعمد او قصد اللي هو كأنه غريزة في الشخص حسب قربه من الشخص الآخر ومدى قوة الرابطة بينهم.
ومن الأمثلة الشائعة عليه: العلاقة بين الوالدين والأبناء، والزوج وزوجته، والمحبين، والأصدقاء المقربين والتوائم.
وحسب الباحث البيولوجي روبرت شيلدريك فمن الأمثلة الشائعة على النوع ده من التخاطر: العواطف القوية في حالات الموت، والطوارئ، والأحزان.
التخاطر العقلي (Mental Telepathy).
وزي ما واضح من اسمه بيتم استخدام العقل بشكل متعمد لتوصيل رسالة معينة للطرف الأخر وتتطلب ممارسته التركيز على شيء واحد، وده لحد دلوقتي لسة نادر جداً.
التخاطر الروحيspiritual Telepathy)
وده النوع الأعلى من أنواع التخاطر، لأنه بيستخدم المستوى الأعلى من مستويات العقل للتعمق داخل الروح نفسها وفهم أسرارها وعوالمها الخفية والبعض بيعتقد إن معظم المفكرين والعباقرة امتلكوا القدرة على الدخول للعوالم الخفية من الروح، باستخدام التخاطر الروحي وإن ده ساعدهم في إحضار المخترعات، والفنون، والأفكار المستنيرة لعالمنا المادي!!
العديد من التجارب العلمية اتعملت لكشف الغموض، وفتح نوافذ جديدة لطريقة عمل الدماغ، اللي بيبعت إشارات ضوئية صغيرة وموجات "كهرطيسية" اللي ممكن تكون صغيرة جدا أو مشوشة، التجارب دي ساعدت العلماء على التوصل للاستنتاجات الجاية:
• أدمغتنا مصممة لالتقاط إشارات اجتماعية دقيقة.
• أدمغتنا مؤهلة للاتصال عبر مسافات كبيرة، بترددات متشابهة.
• أغلب الناس لديهم القدرة على التخاطر، لكن بعض الأشخاص يملكون قدرة أكبر من غيرهم.
• التخاطر يتطلب مزيدًا من الانفتاح العاطفي على الآخر، كما تشير إليه دراسة عن الأشخاص الذين لديهم نسبة عالية من هرمون الأوكسيتوسين، عندما يعانقون بعضهم البعض.
من ضمن التجارب اللي اتعملت لتوثيق موضوع التخاطر ده تجربة إتعملت و أكدت إن التوأم كمان بينهم تخاطر لأنهم عندهم نفس التردد [ جابوا توأم من الأطفال الصينين كانوا متعلقين ببعض جداً ، و حطوا واحد منهم في بلد و التاني في بلد تانية بينهم ألاف الأميال، لقوا بعد فترة إن لو واحد منهم تعب التاني بيتعب و لو واحد زعل التاني بيزعل ]
والتجارب دي اتعملت على الحيوانات كمان ولقيوا نفس النتيجة على أرنبة مثلا اخدوا منها رضيعها وفضلوا يعذبوه في غرفة بعيدة عنها وهي بتتوجع معاه في نفس اللحظة!
ومن أشهر القصص عن التخاطر في الإسلام اللي حصلت مع سيدنا عمر والمعروفة ب ( سارية الجبل)
-[ سارية الكناني ] هو أحد قادة جيوش المسلمين في فتوحات بلاد فارس و لما كان بيقا•تل المشركين على أبواب [ نهاوند ] في بلاد الفرس اتكاتر عليه الأعداء.
في نفس اليوم كان أمير المؤمنيين عمر بن الخطاب بيخطب يوم الجمعة على منبر رسول الله ﷺ في المدينة ،وفجأة وبدون مقدمات الناس لقيت سيدنا عمر بينادي بـأعلى صوته أثناء خطبته
[ يا سارية الجبل، الجبل، من استرعى الذئب الغنم فقد ظلم ]
بعد انتهاء الخطبة اتقدم الناس نحو عمر و سألوه عن الكلام ده وقصده ايه فقال:
[ والله ماألقيت له بالاً، شيءٌ أتى على لساني ]
بعدها قالوا لـ سيدنا [ علي بن أبي طالب ]:
ما هذا الذي يقوله أمير المؤمنين؟ وأين سارية منّا الآن؟
فقالهم:
[ ويحكم! دعوا عمر فإنه ما دخل في أمر إلا خرج منه ]
بعدها بفترة جه سارية على سيدنا عمر في المدينة فقاله :
[ يا أمير المؤمنين، تكاثر العدو على جنود المسلمين وأصبحنا في خطر عظيم، فسمعت صوتاً ينادي: "يا سارية الجبل، الجبل، من استرعى الذئب الغنم فقد ظلم".
عندئذ التجأت بأصحابي إلى سفح جبل واتخذت ذروته درءاً لنا يحمي مؤخرة الجيش، وواجهنا الفرس من جهة واحدة، فما كانت إلا ساعة حتى فتح الله علينا وانتصرنا عليهم".
القصة دي تحتمل شقين شق ممكن نفسره بالتخاطر واستقبال وارسال بين سيدنا عمر لسيدنا سارية.
وشق اللي فسره المفسرين إنها كرامة لسيدنا عمر أنه يستبصر اللي حاصل في بلاد الفرس وهو في المدينة بل ومعاها حل المعضلة اللي أنقذت المسلمين والقدرة على إيصال الرسالة.
لكن هل التخاطر بالسهولة دي واي حد يقدر يعمله؟
لا طبعاً ده بيحتاج قدرات خاصة وتدريبات شاقة وتركيز عالي لأيام وشهور وفي ظروف خاصة وممكن بعد كل ده متنجحش ومش كل شخص مهيأ لاستقبال رسايلك وأفكارك او كل شخص معاك التردد الشخصي الخاص بيه.
وأنه كل ما كانت العلاقة العاطفية بينكم قوية فده بيسهل الأمر بس مش معناه أنه لازم يحصل.
فكل اللي بتقول دنا عملتله تخاطر وحبني او كذا فده اما هبد او راحت لناس علموها طرق أخرى بعيدة التخاطر وتدخل تحت بند السحر الأسود واستخدام القرين او الاسقاط النجمي.. ودي أمور أخرى مؤذية للطرفين وممكن تخرج صاحبها من الملة فاحذروا ياريت.
التسميات :
معلومات عامه