مطلوب مهندس حديث تخرج

المشهد كالآتي: مهندس حديث تخرج بقاله فترة بيدور على شغل و لسه مالقاش وظيفة مناسبة و بدأ الإحباط يتمكن منه و قرب ييأس 
يقابل بالصدفة مقاول غالباً بيكون معرفه.. المقاول بيعرض عليه عرض سخي جداً، إنه هياخد منه صورة كارنية النقابة و صورة البطاقة هيأمن عليه بيهم و يديله في المقابل مبلغ مالي و يقنعه إن ده مجرد إجراء بسيط و مش هيسبب له أي ضرر أو مسئوليه.
نهاية المشهد: نظرا لضيق الحال المهندس بيوافق و بيسلم صورة كارنية النقابة و صورة البطاقة للمقاول و يستلم المبلغ و يرحل في صمت 
انتهى!

الموقف ده من أخطر المواقف اللي ممكن يتعرضلها المهندس حديث التخرج، عشان كدة يا ريت كل المهندسين يركزوا في كل كلمة في البوست ده عشان ماتوقعش نفسك في مشاكل إنت في غنى عنها. 
ممكن تتعرض لموقف إن #مقاول يطلب منك #كارنية_النقابة و #صورة_بطاقتك عشان يأمن عليك (بدون ماتشتغل معاه) و غالباً هايعرض عليك مقابل مادي و هايقنعك إن ده مجرد إجراء روتيني مافيش منه أي ضرر عليك و هايفصلك من التأمينات وقت ماتطلب..
في البوست ده هانفهم مع بعض يعني إيه #تأمينات؟ و ليه المقاول بيبقى عاوز يأمن على #مهندسين؟ و إيه الضرر اللي ممكن يقع عليك بسبب ده؟ و المفروض تتصرف إزاي؟

يعني إيه تأمينات؟ 

التأمينات ببساطة هي إن القانون المصري بيلزم أي شركة إنها تأمن على كل الموظفين اللي فيها و ده بيكون من خلال إنها تدفع مبلغ شهري عن كل موظف لوزراة التأمينات و ده علشان لما الموظف يطلع معاش أو لا قدر الله في حالة العجز أو الوفاة.. بيتصرف ليه أو لأسرته معاش شهري، و التأمينات طبعاً حاجة كويسة و هي اللي بتضمن حقوق الموظف في الشركة قدام القانون (ده في حالة إنك تكون شغال في الشركة اللي هايتأمن عليك من خلالها طبعاً)

طب ليه المقاول بيبقى عاوز يأمن عليا أصلاً وهايستفيد إيه من كده؟ 

أي مقاول عاوز يشيل شغل من الجهات الحكومية أو الجيش مثلاً.. بيكون شرط أساسي إنه يكون مسجل في حاجة إسمها ( #إتحاد_مقاولي_التشييد )
و اتحاد المقاولين ده بيكون 7 فئات يعني المكاتب الصغيرة بتكون فئة سابعة و لما تكبر شوية تبقى فئة سادسة و تبدأ تترقى تدريجياً لحد ماتوصل للفئة الأولى للشركات العملاقة
و من الشروط الأساسية للتسجيل في #إتحاد_المقاولين هو إن #المقاول أو #مكتب_المقاولات يكون عنده - على الأقل - #مهندس_واحد شغال معاه في نفس التخصص اللي هو هايشتغل فيه..
و عشان مكتب المقاولات ده يترقى في الفئة بتاعته لازم يكون عنده عدد أكبر من المهندسين اللي شغالين معاه، ولازم طبعاً يقدم إثبات مايفيد إنه عنده عدد معين من المهندسين.. و الإثبات ده ببساطة هو #إستمارة_التأمينات للمهندسين اللي شغالين معاه..
المهم بقى إن فيه موضه بايخه طلعت مؤخراً و هي إن المقاولين عشان يوفروا رواتب المهندسين بدل مايروحوا يشغلوا المهندسين اللي مش لاقيين شغل.. بقوا بيكتفوا فقط بإنهم يدوروا على أي مهندس حديث تخرج يضحكوا عليه بكلمتين و ياخدوا منه #كارنية_النقابة عشان يفتحوا بيه ملف تأميني (بدون ما المهندس ده يشتغل معاهم) و بكده يبقوا هما قدام الجهات الحكومية مأمنين على عدد من المهندسين و مستفين ورقهم و يقدروا بسهولة يشيلوا شغل و يكسبوا فلوس في الوقت اللي حضرتك قاعد فيه من غير شغل!
و طبعاً المقاول بيوعد المهندس إن الموضوع من الآخر #شكة_دبوس

طب إيه الضرر اللي ممكن يقع عليا في حالة إن المقاول أمن عليا؟ 

• 1- مش هاتعرف تشتغل في أي شركة كبيرة إلا لما تفصل نفسك من التأمينات مع المقاول ده الأول و احتمال كبير مايرضاش يفصلك أو يتهرب و ساعتها هاتدوخ عشان تفصل نفسك و غالباً الشغلانه الجديدة هاتطير منك
• 2- لازم تعرف كويس جداً إنك بكدة بتخالف #القانون و بتساعد المقاول ده إنه ينفذ شغل بدون وجود مهندس يشرف على الشغل و يتابعه.. و هاتشيل ذنب و إثم أي شغل ممكن يتعمل غلط، من الآخر إنت بكدة بتساعد مقاول إنه يعمل شغل #شمال
• 3- إنت كدة بدون ماتاخد بالك بتساهم بشكل أساسي في #بطالة_المهندسين لأن حضرتك لو ماكونتش وافقت إن المقاول ده يأمن عليك كان هايضطر إنه يشغلك أو يشغل مهندس غيرك بشكل رسمي بس للأسف هو بيستغل عدم فهم المهندسين و بيضحك عليهم
• 4- لازم تعرف إن مهنتنا دي مهنة حساسة جداً و انت كدة بكل بساطة بتخالف #شرف_المهنة و بتبيع#إسمك لحد ماتعرفوش بتراب الفلوس
• 5- لا قدر الله في حالة إن حصل مصيبة في شغل المقاول ده ممكن يزور توقيعك على المستخلصات و طلبات الإستلام و الأوراق و يلبسك في الحيط و ساعتها تبقى تشوف محامي شاطر عشان يخرجك من الورطة اللي هاتقع فيها

هل ينفع أفصل نفسي من التأمينات في أي وقت لو المقاول مارضيش يفصلني؟ 

هو المفروض إن المقاول هو اللي يفصلك من التأمينات بس لو مارضيش.. و روحت عشان تفصل نفسك مش هاتعرف، فالحل في الحالة دي إنك بتروح تقدم شكوى في #مكتب_العمل عشان تفصل نفسك من التأمينات و الموضوع طبعاً بياخد شويه وقت عشان الروتين اللطيف بتاعنا و على ما تعرف تفصل نفسك هاتكون الشغلانه الجديدة طارت منك، مش بس كدة.. ده في حالة إنك انت المهندس الوحيد المؤمن عليه من خلال المقاول ده.. هيكون شبه مستحيل إنك تفصل نفسك بنفسك إلا بعد ماتوكل محامي يخلصلك الموضوع لأن مكتب التأمينات بيضطر يخاطب إتحاد المقاولين و ليلة كبيرة أوي سعادتك.

طب إزاي أعرف موقفي التأميني الحالي  و هل أنا متأمن علياولا لأ ؟ 

ببساطة فيه رقم مختصر تقدر تتصل بيه و تقولهم رقمك التأميني و هايردوا عليك في نفس اللحظة.. خد بقى يا سيدي الرقم سجلوا على موبايلك دلوقتي 16217

يعني إيه رقمي التأميني ده و اعرفه إزاي ؟ 

كل شخص بيكون ليه #رقم_تأميني زي الرقم القومي كدة.. و ده عشان تعرفه لازم تروح أي مكتب تأمينات و بتوريلهم البطاقه أو شهادة الميلاد و انت واقف بيدولك الرقم.. و ده طبعاً رقم ثابت مابيتغيرش لكل شخص

الخلاصة

ماتوافقش يا هندسة إن أي مقاول يأمن عليك إلا لو كنت فعلاً شغال معاه في نفس الشركة.. و في الحالة دي لما تمشي من الشركة لازم تتأكد إنه تم فصلك من التأمينات و تاخد معاك إستمارة الفصل من التأمينات في إيدك و انت ماشي (إستمارة 6)