تعرف ايه عن الي حصل في روزويل سنه 1947 وسبب رعب وخوف للعالم كله ؟
شوف يسيدي في شهر يوليو سنه 1947 صحي سكان مدينة (رزوزيل) علي صوت أنفجار ضخم ولقوا ان السماء يعتبر كلها نار من كتر الدخان، بس علطول سيطرت قوات الجيش الأمريكي علي الحوار ومنعت أي حد يقرب من موقع الانفجار لدرجه انها وضعت حظر تجول وقالت ان الي هيقرب من الموقع او يخرج من بيته هيضرب بالرصاص !
وكان واضح اوي ان الجيش الامريكي حريص انه يداري علي الي حصل.
بس بعد كل الحرص والخوف ده في ناس كتير طلعت وقالت انها شافت الي حصل.
تعرف الناس دي قالت انها شافت ايه ؟
الناس دي بتقول انهم شافوا "طبق طائر" جواه مخلوقات غريبه في السماء وبعدين وقع علي الأرض وهو ده السبب في الانفجار وبعدها علطول شافوا عربيات نقل ضخمه جت أخدت الجثث الي كانت في الطبق ده وخرجت من المدينة كلها في فتره حظر التجول ولأن الناس دي كانت قريبه جدا من موقع الانفجار فقدرت تشوف الي حصل من خلال شبابيك بيوتهم الصغيره.
وبعد الحادثه بيوم علطول أنتشر الخبر وجريدة روزويل الرسمية أصدرت خبر بعنوان (سلاح الطيران الأمريكي يأسر طبقا طائرا) وأمريكا والعالم كله بقي بيتكلم عن الخبر وكان الناس كلها بتطالب الحكومه والجيش الأمريكي بالرد والكشف عن تفاصيل الحادثة، بس الغريب ان الحكومة التزمت الصمت تماما وتجاهلت الموضوع.
وفضل الحال علي كده يوم والتاني والتالت لحد ما عدي أسبوع، وبعدها نزلت جريدة روزويل تصريح تاني بس المرادي بتنفي فيه الخبر الي نزلته عندها وقالت أن الي سقط من السماء ده منطاد حديث لدراسة الطقس، وبعدها وسائل الاعلام والجيش عرض صور للمنطاد ده وهو متكسر وواقع في الارض وقالت ان هو ده السبب في الانفجار.
بس طبعا محدش صدق والناس بقت تسأل الحكومة، طب وهو لو الي حصل ده بسبب المنطاد ليه أستنت الجريدة أسبوع كامل عشان تنفي الخبر وليه كان في حالة خوف في الجيش وليه تم فرض حظر تجول كامل ؟
وكمان خرج بعدها الناس الي كانت بتشرف علي جمع الحطام بتاع الشئ الغريب الي وقع من السماء وقالت ان الصور الي الجيش بعتها لوسائل الاعلام دي غير صحيحه وان الحطام الي هما أشرفوا عليه غير الي في الصور تماما ، ووقتها في ناس كتير خرجت من الجيش وقالت ان المعلومات دي مش صح.
وبعدها الناس بدأت تطالب الحكومه بالرد تاني بس وقتها الحكومه مردتش لحد ما الموضوع أتنسي وعدت السنين علي الحال ده.
لحد ما جي كاتب وصحفي مشهور أسمه (تشارلز بيرلتز) سنه 1980 وكتب عن الموضوع من تاني في كتاب أسمه (واقعة روزويل) وبعدها الكتاب ده بقي الأعلي مبيعًا في العالم لسنة 1980، وده لأن الكاتب ذكر فيه كل حاجه عن الطبق الطائر الي ظهر وقتها وقال ان الطبق ده كان في جثث لمخلوقات مُرعبه، وأتهم الكاتب الحكومه الامريكيه بأنها بتخفي الحقيقه عن الناس.
وبعدها الموضوع أنتشر تاني وبدأت الناس تطالب الحكومه بالرد من تاني، وكالعاده يعني الحكومه عملت نفسها من بنها ومردتش عليهم.
والموضوع عدي برضو عادي لحد بقي ما جت سنة 1984 يرايق ووقتها الإثاره زادت من تاني بقي.
سنة 1984 (وصل) للباحث الأمريكي (ويليام مور) الي هو متخصص في دراسة الأطباق الطائرة (ظرف غريب) فتحه لقي جواه فيلم 35 مم ولما تم تحميض الفيلم أكتشف ويليام أنه بيحتوي علي صور وثائقية قديمة جدا من نائب الرئيس الأمريكي (آيزنهاور) للمكان والطبق الطائر الي وقع في روزويل، بس وقتها محدش أهتم اوي وقالو انها ممكن تكون مزيفه وصور fake.
وسنة 1994 في مجله عالمية أسمها omni كتبت عن الحوار وطالبت الناس بعدم السكوت.
وده الي خلي في أقل من شهرين أكتر من 14 مليون شخص يطالب الحكومه الأمريكية بالرد.
لحد بقي ما في مارس سنة 1995 حصل حاجه غريبة جدًا.
الي حصل يسيدي أن في طيار أمريكي متقاعد أسمه (راي سانتيلي) عنده 80 سنه أعلن انه بيمتلك فيلم كامل بيحتوي علي تفاصيل مُرعبه وعملية تشريح كاملة للمخلوقات الفضائية الي كانت في الطبق الطاير وقال أن في شخص اسمه (جاك بارنيت) هو الي صور الفيلم ده بناء علي طلب الحكومة الأمريكية وقتها وقال (راي سانتيلي) انه قرر يعترف دلوقتي بالحقيقه لانه حاسس ان الموت قريب منه وكمان خايف يموت من غير ما يعرف الناس حقيقة الي حصل في روزويل وانه اخفي السر كل السنين دي خوفا من الجيش الأمريكي وخايف يحصل فيه زي الي حصل مع صديقة (جاك بارنيت) الي اداله الفيلم قبل اختفائه بأيام بسيطه.
وبعدها الفيلم أنتشر جدا في العالم كله وأتذاع في كل المحطات التلفزيونية وقتها وأصاب العالم كله بالذهول والرعب.
والغريب والمُرعب أكتر ان الشخص الي اسمه (جاك بارنيت) الي هو المفروض مصور الفيلم اختفي فعلا ومش كده وبس، ده كمان مفيش حد أسمه (جاك بارنيت) في السجلات اصلا وأكنه مكنش موجود ولا أتولد من الأساس.
طب والفيلم ده صحيح ولا fake ؟
شوف يسيدي هو الفيلم أتعرض علي خبراء كتير وتم تحليله بشكل دقيق.
وفي خبراء من شركة كوداك العالمية قالت أن الفيلم بيعود لفتره الأربيعينات فعلا وان الفيلم أتصور بين 1945 ل1948.
وخبراء الخدع السينمائية في هوليود قالوا وقتها أن إصطناع كائنا كهذا الذي يتم تشريحه في الفيلم أمر بالغ للصعوبة فالأنسجة والخلايا كانت تبدو لهم حقيقة تماما، وكمان وقتها مكنش في ولا مونتاج ولا اي حاجه تسمح بكده نهائي.
وكمان الاطباء الشرعيين قالوا ان عملية التشريح الي في الفيلم سليمة وان الي بيقومو بعملية التشريح دول ناس عارفه هيا بتعمل ايه كويس، وقالو ان الكائن الي بيتم تشريحة ده مش بينتمي لأي فصيلة أرضية.
ومن بعدها العالم كله والشعب الأمريكي بقا بيتكلم عن الحوار والموضوع أنتشر جدا لدرجه ان رئيس أمريكا وقتها (بيل كلينتون) طلع من ايرلندا الشماليه لأنه كان في زياره هناك عشان يتكلم مع الشعب الأمريكي من خلال وسائل الاعلام وعشان يهدي الوضع وقال :
( لو هذا قد حدث بالفعل في 1947 والقوات الجوية أحتفظت بالجثث فإنهم لم يطلعوني علي الأمر)
أنت متخيل الي طلع قاله الرئيس الأمريكي وقتها ؟
وفضل الشعب الأمريكي والعالم كله في حاله خوف كده لحد سنة 1997 لما طلعت الحكومة الأمريكية عشان ترد ع الكل.
وقالت في بيان رسمي ان ما سقط في روزويل عام 1947 ده طائره عسكرية سرية كانت بتحمل (دمي) وبيتم التحكم فيها عن بعد وأثناء الاختبار سقطت الطائرة بسبب خلل طارئ ونزلت الحكومة صور لدمي خشب وأدعت وقالت ان هي دي الكائنات الي الناس شافتها وأفتكرتها مخلوقات فضائية وقالت الحكومة ان الوضع كان سري وعسكري وعشان كده محدش قال عنه.
بس البيان ده خلي الناس تتأكد اكتر ان الفيلم ده بجد وحقيقي لان البيان تجاهل الفيلم ومذكرش حاجه عنه وكمان الحكومه كده غيرت كلامها لأنها في الاول قالت انه منطاد للقطس وبعدين قالت انه طياره عسكرية ف كله كدب الحكومة.
وكمان الشئ الغريب أكتر ان معظم الناس الي أشرفت علي نقل حطام الشئ الي وقع في روزويل طلعت وقالت انها أتفصلت من الجيش وقتها وتعرضوا لتهديدات بالقتل لو اتكلموا عن تفاصيل الحادثة.
أنت من وجهه نظرك شايف ايه الي حصل في روزويل يومها؟
وشايف الكائنات الي ظهرت دي ممكن تكون حقيقية فعلًا؟
وبس يسيدي وعموما هو لحد دلوقتي محدش عارف الحوار ده صح ولا غلط وفي شايف انه صح وفي شايف ان غلط وانا ولا مع ده ولا مع ده ، انا زيي زيك بس الاختلاف الي بيني وبينك ان انا جبت المعلومات وكتبت عن الموضوع وانت قرأت عشان التسلية وأهي معلومه جديده انت بتعرفها سواء هيا صح او غلط،
التسميات :
معلومات عامه