تعرف حاجه عن لغة السغه لمون الي ظهرت في اعلان أحمد حلمي وتريند دلوقتي وكل التايم لاين بيتكلم عنها ؟

 تعرف حاجه عن لغة "السغه لمون"

تعالي أنا هفهمك الحوار كله ، بص بقي يسيدي اللغه الغريبه الي انت مش فاهمها دي اسمها "سغة لمبة" او "سغة لمون"
وهيا باختصار لغه كان بيستخدمها الناس زمان ايام الاحتلال الانجليزي لمصر يعني بين سنه 1914 ل 1922 (ك شفره) بينهم وبين بعض، عشان الجنود الإنجليز الي عارفين عربي ميقدروش يفهموا لغه الشعب المصري وكمان كان بيسخدمها المجرمين لو في حكومه في المكان او غريب ما بينهم وكان بيستخدمها برضو الشباب عالناصيه زمان لو في واحد بينهم مش عايزين يعرفوه هما بيتكلموا ف ايه.
وفضلت اللغه مكمله لحد ما بدأت تتنسي وبدأت السوشيال ميديا تسيطر علي الناس ومبقاش في وقوف ع الناصيه زي زمان ، بس أحمد مكي كان اول واحد يرجع استخدام اللغه دي سنه 2017 في تراك (وقفه ناصيه زمان) لما قال :
"وقفه الناصيه إتعلمنا فيها كتير لغات "السغه لمون" كانت لغه بنرغي بيها لساعات، لو في غريب ما بينا ومش عاوزين يفهم معني الحاجات "ساسب حواجب سفهم يتنيل ساجه حالات"

هتقولي طب فهمني ايه الحوار ده؟

هقولك الموضوع سهل اوي، أنت بس هتشيل حرف ال(س) من كل كلمه وتحط أول حرف من الكلمه الي بعدها.
يعني كمثال
(كلمه ساسب حواجب)
هنشيل ال(س) من كلمه ساسب زي ما اتفقنا وهنحط مكانها اول حرف من الكلمه الي بعدها الي هيا حواجب وهناخد منها اول حرف ال(ح)، تبقا الكلمه الجديده "حاسب"
وكلمه (سفهم يتنيل)
هنشيل ال(س) من سفهم زي ما اتفقنا وهنشيل اول حرف من يتنيل وهتكون الكلمه الجديده "يفهم"
وكلمه (ساجه حالات)
هتبقي بعد التعديل (حاجه)
يعني احمد مكي لما كان بيقول :
"ساسب حواجب سفهم يتنيل ساجه حالات"
كان قصده
"حاسب يفهم حاجه"
فهمت يمعلم ولا لسه؟
لو مفهمتش لسه هبسطلك الحوار اكتر واكتر.
بص انا لو عايز اقول أسمي بالغه دي هقوله ازاي.
هقول مثلا "سحمد أروع ساصر نور"
وانت لما هتشيل ال (س) وتحط أول حرف من الكلمه التانيه هتفهم ان انا بقولك "أحمد ناصر"
وحرف ال (س) ممكن يتحط ف اول الجمله او نصها او اخرها عادي.
واسم اللغه نفسه معتمد ع الحوار ده يعني هيا اسمها "السغه لمون" ولما تشيل ال(س) من "السغه" وتحط (ل) الي في "لمون" هتكون (اللغه).
وإعلان أحمد حلمي الجديد بتاع إتصالات أستخدم الموضوع بشكل أكبر والاعلان ده لما نزل من أسبوعين في ناس كتير أفتكرت ان الاعلان تافهه وملهوش معني بس الحقيقه انهم غلطانين لان الإعلان معتمد علي لغه (السغه لمون) ومش كتير فهم الإعلان.

يعني احمد حلمي قال 6 جُمل في الإعلان باللغه دي وهما
١_ سدد جون
٢_الساقه باللون
٣_ سسبوع البوم
٤_ستينين امازون
٥_سو ارانب
٦_سهر شماسي
واكيد انت دلوقتي عرفت تجمع الكلمات في مخك صح؟؟ وشلت حرف ال(س) وحطيت اول حرف في الكلمه الي بعدها وفهمت الإعلان.

الترجمه:

أحمد حلمي كان بيقول :
١_جدد
٢_الباقه
٣_اسبوع
٤_اتنين
٥_او
٦_شهر

"جدد الباقه اسبوع او اتنين او شهر"
فهمت بقي يرايق ؟ اهو الناس الي أضرت من التريند ده وشهره الموضوع الحراميه لأن لغتهم خلاص أتفضحت، بس انت ممكن تستخدم اللغه دي مع صحابك في الكليه او الدروس مثلا وتختارو حرف مميز ومعين بينكم كده تكونوا متفين عليه يعني كمثال حرف ال(م) وتحطوه في اول كل كلمه بتقولوها.
وفي مؤلف اسمه (محمد لطفي) كتب في كتابه عن اللغات السريه للمجرمين في العالم وكان من بينهم لغه (السغه لمون) في مصر ولغه (فرنسية بادلر) في بريطانيا الي أخترعت سنه 1530.